Bismillaahi Noo Diran: Bashir Sh. Omar Goth

Bismillaahi Noo Diran: Bashir Sh. Omar Goth

Bismillaahi Noo Diran: Bashir Sh. Omar Goth

Sept.03 – (Idhanka-)-Maansadan waxa waxa aan curiyay bishii February 18 keedii 1985. Xilligaas waxa aan si xoogle u akhriyi jirey falsafadda reer galbeedka gaar ahaan hal doorkooda ay ka midka yihiin Friedrich Nietzsche and Jean Paul Sartre iyo kuwa kale oo ahaa raggii hormuudka u ahaa aragtida loo yaqaan existentialism. In kasta oo aan dhab ahaantii aad u jeclaystay doodahooda, haddana igama ay bi’in harraadkii aan u qabay raadinta iyo ka gun gaadhidda runta iyo arrimaha xaqiiqada ah.

Markaas ka dib ayaa waxa aan bilaabay in aan u jeesto akhrinta cilmi suufiyada Islaamka, gaar ahaan Al Ghazali iyo kitaabkiisa yar ee la yidhaahdo “Al Munqid Min Al Dalaal” iyo labadii kitaab ee ay iskugu jawaabeen isaga iyo Ibn Rushd oo kala ahaa, Tahaafut Al Falaasifa oo uu qoray Al Ghazali iyo Tahatful Attahafut oo uu qoray Ibn Rushd. Waxa kale oo aan iyana aad uga bogtay aragtidii suufiyada ee Ibn Carabi iyo Al Hallaj, Junayd, Abdulqadir Al Jilani, Ibn Rumi iyo culimo kale oo badan.

Taana waxa iiga sii horreeyey aniga oo intaan Soomaaliya joogay si xoogle u muquurtay falsafadii shuuciyadda oo saamayn badan ku yeelatay fikirkayga intii ay weli maskaxdaydu curdinka ahayd.

Aniga oo haddaba doodahaa badan la daalaa dhacaya, una ciirsan dhinaca falaasifada Islaamka, gaar ahaan cilmi suufiga, ayaan habeen habeenada ka mid ah sheekaysannay rag Soomaaliyeed oo qaarkood yihiin diktoorro shahaadado ku qaatay maaddooyinka ay barteen, hase yeeshee aan wax badan ka aqoon falsafadaha aan anigu mashquulka ku ahaa. Waxaan intayadiiba isku raacnay oo aan iskugu jiibinnay wax markii dambe caqligayga iyo dhimirkayga u cuntami waayey. Nimankaa ay dooddo na dhex martay waxa ay ka soo jeedeen qoysas waranleyaal ah, oo markaa la odhan karo xadhko adag diintu kumay hayn. Aniguse wax aan ka soo jeeday aabbo iyo hooyo ahlu diin ah oo mar kasta oo aan darjiidhis ku dhawaadaba ay i seetaynaysay xusuustii tafsiirkii aabbahay allaylka iyo galabtii culimada u akhriyi jiray iyo hooyaday oo Quraanka hablaha iyo haweenka u dhigi jirtay anigana ahayd macallimaddaydii kowaad.

Dooddaas ka dib waxa aan dareemay aniga oo ka sii siibanaya dhaqankii diineed ee aan ku soo koray ee quruxda iyo degnaanshaha badnaa. Waxaan arkay in aan wixii aan akhriyey ka kasbaday uugaan iyo xasilooni darro keliya. Markaas bay ilmo igu soo joogsatay aniga oo sariirta jiifa, waxaana igu soo booday cutubka ugu horreeya maansada oo ah:

Deyran, Deyran, Deyran
Bismillaahi noo diran
Balaayooyin duuliyo
Wixii duumo cudur jira
Daa’imow na baal mari…

Dabadeed intaan qalin iyo warqad haabtay ayaan dhammaystiray. Markaan akhriyey ayey naxariisi i gashay oo sidii qof xanuunsanaya oo taxliil lagu akhriyey ayuu ii noqday deyr malayko oo aan si fiican u seexday.

Deyran, deyran, deyran
Bismillaahi noo diran
Balaayooyin duuliyo
Wixii duumo cudur jira
Daa’imow na baal mari

***
In kastoon dambiiliyo
Anuu daayac weyn ahay
Ka hallaabay dooddii
Dacwaddii Ilaahiyo
Dawgaan ku soo koray
Diidi mayo abidkay

***

Cilmi dunida yaalliyo
Kun digtoora oon helo
Ima doorin karayaan

***

Daliilkii Quraankiyo
Xadiis laga dillaacshiyo
Run baan dabada haystaa

***
Awliyada dawaaftiyo
Kuwa Eebbe soo diray
Dawgay mareen baan
Sii daba tumaayaa

***

Dhaqanka iyo diintuna
Sida diirka oogada
Midabkayga dugulkeen
La ii doorin karahayn
Waa xidid dubaaqiyo
Dabacaygu yeeshoon
Sina iiga duugmayn

***

Tacliintaan durduurteen
Dugsiyada ka soo helay
Noqon mayso dawlaab
Haddaan diintu garab ool

***

Nacas baa dulbaaxshoo
Sheekaduu diktoor gaal
Buugagga ugu daabacay
Kaga booda dayrkoo
Ku deldela naftiisee
Anuu duur kastoon xulo
Ma darjiidho abidkay

***

Diintuu lahaa iyo
Dhaqankiisi dahabki
Ninkii doojin waayee
Digriigiisa fuulee
Madaxiisa door biday
Waa weel dalooshamay

***

Waa sida digaaggii
Kibir dacasha taagee
Daaciisa ciiddiyo
Inay dunidu kelidii
La dumayso moodee
Diiday lugaha meel qudha
Darandoorri mooyee
Inuu meel is daba dhigo

***

Waa malab dameer sido
Oon dahabka guud yaal
Culayskiisa daashaday
Inuu daadsho mooyee
Nafci kale ka doonayn

***

Waa baal dalwanayoo
Dabayluhu eryaayaan
Cilmiguu ku daaluu
Daranyada u soo maray
Hoos uguma daadegin

***

Ninka soddonka deeqdiyo
Daalacday Quraankee
Ku dabbaqay aqoontee
Sharaxiisa daba galay
Cilmi dunida yaalloo
Ka dahaadhan maan garan

***

Hadday tahay dabaylaha
Dayaxaa la fuuliyo
Dusha sare wixii jira

***

Badda dawanka weynliyo
Buuraha dabbaaliyo
Ciiddaan dul joogneen
Ka dalgayno maadhkiyo
Hadday tahay wax duur gala
Iyo duunyo xoolaad

***

Dadka uu Ilaahay
Garaadka ugu deeqee
Uunka daadaheeyiyo
Shimbiraha dawaafiyo
Xasharaadka duuliyo
Hadday tahay duduma iyo
Midka gala dalool geed

***

Dhirta damalka weynliyo
Dooggiyo xareeddiyo
Hadday tahay durdurradaa
Daymaha waraabshee
Buuraha ka daadega

***

Dadka kala wadkiisiyo
Hadday nolol distoorliyo
Tahay dawlad iyo xeer

***

Doc kastoo la eegaba
Daliilkii Quraankiyo
Xaqu wuu ku soo degay

***

Runta dunida taallee
Daa’im noogu baaqiyo
Digniinaha ilaahay
Ninkii diiday yeelkii

***

Weli diinta qayboo
Samuhu uu ka daalacay
Oo doobir khayrliyo
Darajooyin weynloo
Markuu samada daymada
Dusha sare jalleecuu
Wejigiisu soo dego
Isagoon dabuub celin
Cirku soo darrooroo
Daruuruhu hillaacaan
Ninka dood u yeeshee
Daniyaaya xeeshii

***

Anuu dhaqanka diintiyo
Dermadaan ku soo koray
Doorin maayo abdikay
Ducadii qubuurtiyo
Dikrigii arddaayadu
Dookhayga laabtuu
Doobaar ku yeeshoo
Waa daabac jiidhkiyo
Ku dahaadhan beerkoon
Dugsadaa abiidkay
Oon la iga dumin Karin.

Bashir Goth
Email: bsogoth@yahoo.com

Be Sociable, Share!
Both comments and pings are currently closed.

Comments are closed.

Get Adobe Flash player